പരോൾ

ഹരിതനീഡം

കൊഴിഞ്ഞു പോയെങ്കിലും

പ്രണയമൌലിക-

വാദം തുടര്‍ന്നു നാം,

ചിറകു വീശി-

പറന്നതാകാശവും

ഹൃദയവും കിളി-

ക്കൂട്ടവും ഓര്‍മ്മയും,

നരകമാണവി-

ശ്വാസപ്രമേയത്തില്‍

വിരല്‍ പതിച്ചതും

നമ്മെ ചതിച്ചതും,

വിഹിതമാകുന്നൊ-

രാലിംഗനത്തിലും

വികൃതമാകുന്നു

ചുംബനമെങ്കിലും

അകലെയില്ലാത്ത

മുന്തിരിത്തോപ്പിലും

സ്വഗതസഞ്ചാര-

മെത്തുന്നു നിര്‍ദ്ദയം,

അവിടെ നാരായ

വേരുകളാഴ്ത്തുക

അവിടെനിന്നു നാം

പൂക്കണ്ണി നീട്ടുക,

ഉടല്‍ പിഴിഞ്ഞു ഹാ!

മുന്തിരിച്ചാറിന്റെ

ലഹരി സന്ദര്‍-ശകര്‍ക്കായ്‌  കരുതുക,

പ്രണയമേ നമു-

ക്കിന്നുള്ള ഭൂമിക,

പ്രണയമേ നമു-

ക്കിന്നുള്ള ജീവിക,

എതിരു നിലക്കാത്ത

ലിംഗങ്ങള്‍ ഗൂഡമായ്,

സകലതും സമര്‍-

പ്പിക്കുന്ന സന്ധിയില്‍

അധികസാധകം

ചെയ്തവ,വല്‍സലം

പ്രതിഥരാഗം

ചുരത്തിതളര്‍ന്നവ,

മുലകള്‍,കണ്‍കളാല്‍

നോക്കുന്നു,പൊള്ളുന്നു,

പഴയകീര്‍ത്തനം

ദീപകം,ദുസ്സഹം,

ഇരുളിലാണ്‌ നാം,

വേര്‍പ്പില്‍ കുളിച്ചവര്‍,

ക്രമസമാധാന-

ശാന്തിയും കെട്ടവര്‍,

കിരണമേകമാ

ണെങ്കിലും ദൈവമേ

കനിയണേ,നിന-

ക്കെന്നു ഞാന്‍,പ്രാര്‍ഥനാ-

മുകുളമായ്‌ കൂമ്പി-

മുട്ടുകുത്തുന്നു നീ,

മിഴികള്‍ തോരാതെ,

പെയ്തു നില്‍ക്കുന്നു നീ,

ഇടതുപക്ഷ-

മാകുന്നു നീ,ഞാന്‍ നിന്റെ-

വലതുപക്ഷമായ്‌,

പാതിയായ്‌,അത്ഭുതം!

പുഴകള്‍ തന്‍ പൂര്‍വ്വ-

പുണ്യങ്ങള്‍ വേനലിന്‍-

ജടയില്‍നിന്നും

പിറക്കുന്നു ശാന്തമായ്‌,

പകുതി താഴും

പതാകയ്ക്കുമേല്‍ പടര്‍-

ന്നിളകിടുന്നു

കൊടിത്തലപ്പച്ചകള്‍,

അടിയില്‍ നില്‍പ്പാ-

ണധ:കൃതര്‍ തുമ്പകള്‍,

ബധിരമാകും

മുയല്‍ച്ചെവിക്കൂര്‍പ്പുകള്‍,

ശിഖമുറിയ്ക്കാതെ

ഇല്ലികള്‍,ദ്രാവിഡ-

പ്പെരുമതന്‍ ചുണ-

ച്ചൂരുമായ്‌ ചെട്ടികള്‍,

സമതലം കാത്ത

കൊലിന്നിലില്‍

മതവികാരം

വ്രണപ്പെട്ട ജാതികള്‍.

വിരഹമില്ലാത്ത

ജീവിതം,മൃത്യുവിന്‍

വരവിലും ബാക്കി-

വച്ചിടാം,യാത്രയില്‍-

ഒടുവിലത്രയ്ക്ക് തീവ്ര

വാദത്തിന്‍റെ

വിഘടന സ്വപ്ന-

മണ്ഡ‌ലാതിര്‍ത്തിയില്‍

വിമതെരെന്നു നാം

മുദ്ര കുത്തപ്പെടും,

അറവു മുട്ടി പോല്‍

കാലം ചിരിച്ചിടും

പഴയ പോല്‍ നീല-

വാഹനം നമ്മളെ

തടവറയ്ക്കുള്ളി-

ലാക്കിടാനെത്തിടും

ഇനിയൊരിയ്ക്കലും

ജാമ്യമില്ലെങ്കിലും,

സമര സത്യാ-

ഗ്രഹങ്ങളില്ലെങ്കിലും

മൃതിയില്‍ നിന്നും

കടഞ്ഞെടുക്കാം നമു-

ക്കമൃതമാകുന്ന

വാക്കും വിശുദ്ധിയും.

ഇലമുളച്ചിപോല്‍

രോമകൂപങ്ങളില്‍

മുളകള്‍ പൊട്ടട്ടെ

വാക്കുകള്‍,വിത്തുകള്‍,

അടിയിലേയ്ക്കാഴ്ന്നി-

റങ്ങിടുമ്പോള്‍ സ്നേഹ-

നിയമലംഘന-

മാകട്ടെ ദശനം…

ചിറകൊതുക്കി-

തളര്‍ന്നിരിയ്ക്കുന്നതും

കിളികള്‍ ആകാശം

ഓര്‍മ്മകള്‍ ..എങ്കിലും

അഭിമുഖത്തിന്നു

കാക്കും നിലാവിന്‍റെ

തടവ്‌ ചാട്ടത്തില്‍

അത്ഭുതപ്പെട്ടു നാം,

അഭയമില്ലാത്ത

ദുസര്‍ഗ്ഗസന്ധിയില്‍

നരകയാത്ര-

യ്ക്കൊരുങ്ങി നില്‍ക്കുമ്പോഴും

പ്രണയമാകുന്നു

പ്രത്യയശാസ്ത്രവും

പ്രണയമാകുന്നു

ബോധവും ബാധയും,

പ്രണയമേ നമു-

ക്കിന്നുള്ള ബാധ്യത,

പ്രണയമേ നമു-

ക്കിന്നുള്ള സാധ്യത..!